Neviim (prophètes) » Juges (Choftim)

Chapitre 5

Afficher le commentaire de Rachi Afficher en Français Télécharger le PDF

5,1

וַתָּשַׁר דְּבוֹרָה וּבָרָק בֶּן אֲבִינֹעַם {ס} בַּיּוֹם הַהוּא {ר} לֵאמֹר.

5,2

בִּפְרֹעַ פְּרָעוֹת בְּיִשְׂרָאֵל {ס} בְּהִתְנַדֵּב {ר} עָם בָּרְכוּ יְהוָה.

5,3

שִׁמְעוּ מְלָכִים הַאֲזִינוּ {ר} רֹזְנִים: {ס} אָנֹכִי לַיהוָה אָנֹכִי אָשִׁירָה {ס} אֲזַמֵּר {ר} לַיהוָה אֱלֹהֵי יִשְׂרָאֵל. {ס}

5,4

יְהוָה בְּצֵאתְךָ {ר} מִשֵּׂעִיר {ס} בְּצַעְדְּךָ מִשְּׂדֵה אֱדוֹם {ס} אֶרֶץ {ר} רָעָשָׁה גַּם שָׁמַיִם נָטָפוּ {ס} גַּם עָבִים נָטְפוּ {ר} מָיִם. {ס}

5,5

הָרִים נָזְלוּ מִפְּנֵי יְהוָה: {ס} זֶה {ר} סִינַי מִפְּנֵי יְהוָה אֱלֹהֵי יִשְׂרָאֵל. {ס}

5,6

בִּימֵי שַׁמְגַּר בֶּן {ר} עֲנָת {ס} בִּימֵי יָעֵל חָדְלוּ אֳרָחוֹת {ס} וְהֹלְכֵי {ר} נְתִיבוֹת יֵלְכוּ אֳרָחוֹת עֲקַלְקַלּוֹת.{ס}

5,7

חָדְלוּ פְרָזוֹן בְּיִשְׂרָאֵל {ר} חָדֵלּוּ {ס} עַד שַׁקַּמְתִּי דְּבוֹרָה שַׁקַּמְתִּי אֵם בְּיִשְׂרָאֵל.

5,8

יִבְחַר {ר} אֱלֹהִים חֲדָשִׁים אָז לָחֶם שְׁעָרִים {ס} מָגֵן אִם יֵרָאֶה {ר}וָרֹמַח {ס} בְּאַרְבָּעִים אֶלֶף בְּיִשְׂרָאֵל. {ס}

5,9

לִבִּי {ר} לְחוֹקְקֵי יִשְׂרָאֵל {ס} הַמִּתְנַדְּבִים בָּעָם בָּרְכוּ {ר}יְהוָה. {ס}

5,10

רֹכְבֵי אֲתֹנוֹת צְחֹרוֹת {ס} יֹשְׁבֵי {ר}עַל מִדִּין וְהֹלְכֵי עַל דֶּרֶךְ שִׂיחוּ. {ס}

5,11

מִקּוֹל מְחַצְצִים בֵּין {ר} מַשְׁאַבִּים {ס} שָׁם יְתַנּוּ צִדְקוֹת יְהוָה {ס} צִדְקֹת {ר} פִּרְזוֹנוֹ בְּיִשְׂרָאֵל {ס} אָז יָרְדוּ לַשְּׁעָרִים עַם {ר} יְהוָה. {ס}

5,12

עוּרִי עוּרִי דְּבוֹרָה {ס} עוּרִי {ר} עוּרִי דַּבְּרִי שִׁיר {ס} קוּם בָּרָק וּשְׁבֵה שֶׁבְיְךָ בֶּן {ר} אֲבִינֹעַם. {ס}

5,13

אָז יְרַד שָׂרִיד לְאַדִּירִים עָם {ס} יְהוָה {ר} יְרַד לִי בַּגִּבּוֹרִים. {ס}

5,14

מִנִּי אֶפְרַיִם שָׁרְשָׁם {ר} בַּעֲמָלֵק {ס} אַחֲרֶיךָ בִנְיָמִין בַּעֲמָמֶיךָ {ס} מִנִּי {ר} מָכִיר יָרְדוּ מְחֹקְקִים {ס} וּמִזְּבוּלֻן מֹשְׁכִים בְּשֵׁבֶט {ר} סֹפֵר. {ס}

5,15

וְשָׂרַי בְּיִשָּׂשכָר עִם דְּבֹרָה {ס} וְיִשָּׂשכָר {ר} כֵּן בָּרָק בָּעֵמֶק שֻׁלַּח בְּרַגְלָיו {ס} בִּפְלַגּוֹת רְאוּבֵן גְּדֹלִים חִקְקֵי {ר} לֵב. {ס}

5,16

לָמָּה יָשַׁבְתָּ בֵּין הַמִּשְׁפְּתַיִם {ס} לִשְׁמֹעַ {ר} שְׁרִקוֹת עֲדָרִים {ס} לִפְלַגּוֹת רְאוּבֵן גְּדוֹלִים חִקְרֵי {ר} לֵב. {ס}

5,17

גִּלְעָד בְּעֵבֶר הַיַּרְדֵּן שָׁכֵן {ס} וְדָן {ר} לָמָּה יָגוּר אֳנִיּוֹת {ס} אָשֵׁר יָשַׁב לְחוֹף {ר} יַמִּים {ס} וְעַל מִפְרָצָיו יִשְׁכּוֹן. {ס}

5,18

זְבֻלוּן {ר} עַם חֵרֵף נַפְשׁוֹ לָמוּת {ס} וְנַפְתָּלִי: עַל מְרוֹמֵי {ר} שָׂדֶה. {ס}

5,19

בָּאוּ מְלָכִים נִלְחָמוּ {ס} אָז {ר}נִלְחֲמוּ מַלְכֵי כְנַעַן {ס} בְּתַעְנַךְ עַל מֵי {ר} מְגִדּוֹ {ס} בֶּצַע כֶּסֶף לֹא לָקָחוּ. {ס}

5,20

מִן {ר} שָׁמַיִם נִלְחָמוּ {ס} הַכּוֹכָבִים מִמְּסִלּוֹתָם נִלְחֲמוּ עִם {ר} סִיסְרָא. {ס}

5,21

נַחַל קִישׁוֹן גְּרָפָם {ס} נַחַל {ר} קְדוּמִים נַחַל קִישׁוֹן {ס} תִּדְרְכִי נַפְשִׁי {ר} עֹז. {ס}

5,22

אָז הָלְמוּ עִקְּבֵי סוּס {ס} מִדַּהֲרוֹת {ר} דַּהֲרוֹת אַבִּירָיו. {ס}

5,23

אוֹרוּ מֵרוֹז אָמַר מַלְאַךְ יְהוָה אֹרוּ אָרוֹר {ר} יֹשְׁבֶיהָ: {ס} כִּי לֹא בָאוּ לְעֶזְרַת יְהוָה {ס} לְעֶזְרַת {ר} יְהוָה בַּגִּבּוֹרִים. {ס}

5,24

תְּבֹרַךְ מִנָּשִׁים יָעֵל אֵשֶׁת חֶבֶר {ר} הַקֵּינִי: {ס} מִנָּשִׁים בָּאֹהֶל תְּבֹרָךְ. {ס}

5,25

מַיִם {ר} שָׁאַל חָלָב נָתָנָה {ס} בְּסֵפֶל אַדִּירִים הִקְרִיבָה {ר} חֶמְאָה. {ס}

5,26

יָדָהּ לַיָּתֵד תִּשְׁלַחְנָה {ס} וִימִינָהּ {ר} לְהַלְמוּת עֲמֵלִים {ס} וְהָלְמָה סִיסְרָא מָחֲקָה {ר} רֹאשׁוֹ {ס} וּמָחֲצָה וְחָלְפָה רַקָּתוֹ. {ס}

5,27

בֵּין {ר} רַגְלֶיהָ כָּרַע נָפַל שָׁכָב: {ס} בֵּין רַגְלֶיהָ כָּרַע {ר} נָפָל {ס} בַּאֲשֶׁר כָּרַע שָׁם נָפַל שָׁדוּד. {ס}

5,28

בְּעַד {ר} הַחַלּוֹן נִשְׁקְפָה וַתְּיַבֵּב אֵם סִיסְרָא בְּעַד הָאֶשְׁנָב: {ס} מַדּוּעַ בֹּשֵׁשׁ רִכְבּוֹ לָבוֹא {ס} מַדּוּעַ אֶחֱרוּ פַּעֲמֵי מַרְכְּבוֹתָיו. {ס}

5,29

חַכְמוֹת {ר} שָׂרוֹתֶיהָ תַּעֲנֶינָּה {ס} אַף הִיא תָּשִׁיב אֲמָרֶיהָ {ר} לָהּ. {ס}

5,30

הֲלֹא יִמְצְאוּ יְחַלְּקוּ שָׁלָל {ס} רַחַם {ר} רַחֲמָתַיִם לְרֹאשׁ גֶּבֶר {ס} שְׁלַל צְבָעִים {ר} לְסִיסְרָא {ס} שְׁלַל צְבָעִים רִקְמָה:{ס} צֶבַע {ר} רִקְמָתַיִם לְצַוְּארֵי שָׁלָל. {ס}

5,31

כֵּן יֹאבְדוּ כָל אוֹיְבֶיךָ יְהוָה {ר} וְאֹהֲבָיו כְּצֵאת הַשֶּׁמֶשׁ בִּגְבֻרָתוֹ {ס} וַתִּשְׁקֹט הָאָרֶץ אַרְבָּעִים שָׁנָה. {ר} {ש}