Nos Sages ont institué qu'en plus de la Paracha traditionnelle lue, pendant les Chabbatot autour de Pourim on ajoutera également des passages de la Torah appelés Chekalim, Zakhor, Para et Ha'hodech. Lors des Chabbatot en question, on lira également une Haftara particulière portant le même nom.
L'équipe Torah-Box vous propose les enregistrements de ces différentes Haftarot, d'après l'air marocain, grâce au Rav Ilan Ouaknine. A vous de les préparer pour les réciter dans votre communauté :
Haftarat Chekalim
Rite marocain
Rite tunisien
(יז) וַיִּכְרֹ֨ת יְהוֹיָדָ֜ע אֶֽת-הַבְּרִ֗ית בֵּ֤ין יי וּבֵ֤ין הַמֶּ֙לֶךְ֙ וּבֵ֣ין הָעָ֔ם לִהְי֥וֹת לְעָ֖ם לַֽיי וּבֵ֥ין הַמֶּ֖לֶךְ וּבֵ֥ין הָעָֽם: (יח) וַיָּבֹ֣אוּ כָל-עַם֩ הָאָ֨רֶץ בֵּית-הַבַּ֜עַל וַֽיִּתְּצֻ֗הוּ אֶת- מִזְבְּחֹתָ֤יו וְאֶת-צְלָמָיו֙ שִׁבְּר֣וּ הֵיטֵ֔ב וְאֵ֗ת מַתָּן֙ כֹּהֵ֣ן הַבַּ֔עַל הָרְג֖וּ לִפְנֵ֣י הַֽמִּזְבְּח֑וֹת וַיָּ֧שֶׂם הַכֹּהֵ֛ן פְּקֻדּ֖וֹת עַל-בֵּ֥ית יי: (יט) וַיִּקַּ֣ח אֶת-שָׂרֵ֣י הַ֠מֵּאוֹת וְאֶת-הַכָּרִ֨י וְאֶת-הָרָצִ֜ים וְאֵ֣ת | כָּל-עַ֣ם הָאָ֗רֶץ וַיֹּרִ֤ידוּ אֶת-הַמֶּ֙לֶךְ֙ מִבֵּ֣ית יי וַיָּב֛וֹאוּ דֶּֽרֶך-שַׁ֥עַר הָרָצִ֖ים בֵּ֣ית הַמֶּ֑לֶךְ וַיֵּ֖שֶׁב עַל-כִּסֵּ֥א הַמְּלָכִֽים: (כ) וַיִּשְׂמַ֥ח כָּל-עַם-הָאָ֖רֶץ וְהָעִ֣יר שָׁקָ֑טָה וְאֶת-עֲתַלְיָ֛הוּ הֵמִ֥יתוּ בַחֶ֖רֶב בֵּ֥ית הַמֶּֽלֶךְ: (א) בֶּן-שֶׁ֥בַע שָׁנִ֖ים יְהוֹאָ֥שׁ בְּמָלְכֽוֹ: (ב) בִּשְׁנַת-שֶׁ֤בַע לְיֵהוּא֙ מָלַ֣ךְ יְהוֹאָ֔שׁ וְאַרְבָּעִ֣ים שָׁנָ֔ה מָלַ֖ךְ בִּירֽוּשָׁלִָ֑ם וְשֵׁ֣ם אִמּ֔וֹ צִבְיָ֖ה מִבְּאֵ֥ר שָֽׁבַע: (ג) וַיַּ֨עַשׂ יְהוֹאָ֧שׁ הַיָּשָׁ֛ר בְּעֵינֵ֥י יי כָּל-יָמָ֑יו אֲשֶׁ֣ר הוֹרָ֔הוּ יְהוֹיָדָ֖ע הַכֹּהֵֽן: (ד) רַ֥ק הַבָּמ֖וֹת לֹא-סָ֑רוּ ע֥וֹד הָעָ֛ם מְזַבְּחִ֥ים וּֽמְקַטְּרִ֖ים בַּבָּמֽוֹת: (ה) וַיֹּ֨אמֶר יְהוֹאָ֜שׁ אֶל-הַכֹּהֲנִ֗ים כֹּל֩ כֶּ֨סֶף הַקֳּדָשִׁ֜ים אֲשֶׁר-יוּבָ֤א בֵית-יי כֶּ֣סֶף עוֹבֵ֔ר אִ֕ישׁ כֶּ֥סֶף נַפְשׁ֖וֹת עֶרְכּ֑וֹ כָּל-כֶּ֗סֶף אֲשֶׁ֤ר יַֽעֲלֶה֙ עַ֣ל לֶב-אִ֔ישׁ לְהָבִ֖יא בֵּ֥ית יי: (ו) יִקְח֤וּ לָהֶם֙ הַכֹּ֣הֲנִ֔ים אִ֖ישׁ מֵאֵ֣ת מַכָּר֑וֹ וְהֵ֗ם יְחַזְּקוּ֙ אֶת-בֶּ֣דֶק הַבַּ֔יִת לְכֹ֛ל אֲשֶׁר-יִמָּצֵ֥א שָׁ֖ם בָּֽדֶק: (ז) וַיְהִ֗י בִּשְׁנַ֨ת עֶשְׂרִ֧ים וְשָׁלֹ֛שׁ שָׁנָ֖ה לַמֶּ֣לֶךְ יְהוֹאָ֑שׁ לֹֽא-חִזְּק֥וּ הַכֹּהֲנִ֖ים אֶת-בֶּ֥דֶק הַבָּֽיִת: (ח) וַיִּקְרָא֩ הַמֶּ֨לֶךְ יְהוֹאָ֜שׁ לִיהוֹיָדָ֤ע הַכֹּהֵן֙ וְלַכֹּ֣הֲנִ֔ים וַיֹּ֣אמֶר אֲלֵהֶ֔ם מַדּ֛וּעַ אֵינְכֶ֥ם מְחַזְּקִ֖ים אֶת-בֶּ֣דֶק הַבָּ֑יִת וְעַתָּ֗ה אַל-תִּקְחוּ-כֶ֙סֶף֙ מֵאֵ֣ת מַכָּֽרֵיכֶ֔ם כִּֽי-לְבֶ֥דֶק הַבַּ֖יִת תִּתְּנֻֽהוּ: (ט) וַיֵּאֹ֖תוּ הַכֹּֽהֲנִ֑ים לְבִלְתִּ֤י קְחַת-כֶּ֙סֶף֙ מֵאֵ֣ת הָעָ֔ם וּלְבִלְתִּ֥י חַזֵּ֖ק אֶת-בֶּ֥דֶק הַבָּֽיִת: (י) וַיִּקַּ֞ח יְהוֹיָדָ֤ע הַכֹּהֵן֙ אֲר֣וֹן אֶחָ֔ד וַיִּקֹּ֥ב חֹ֖ר בְּדַלְתּ֑וֹ וַיִּתֵּ֣ן אֹתוֹ֩ אֵ֨צֶל הַמִּזְבֵּ֜חַ מִיָּמִ֗ין בְּבֽוֹא-אִישׁ֙ בֵּ֣ית יְהוָ֔ה וְנָֽתְנוּ-שָׁ֤מָּה הַכֹּֽהֲנִים֙ שֹׁמְרֵ֣י הַסַּ֔ף אֶת-כָּל-הַכֶּ֖סֶף הַמּוּבָ֥א בֵית-יְהוָֽה: (יא) וַֽיְהִי֙ כִּרְאוֹתָ֔ם כִּֽי-רַ֥ב הַכֶּ֖סֶף בָּֽאָר֑וֹן וַיַּ֨עַל סֹפֵ֤ר הַמֶּ֙לֶךְ֙ וְהַכֹּהֵ֣ן הַגָּד֔וֹל וַיָּצֻ֙רוּ֙ וַיִּמְנ֔וּ אֶת-הַכֶּ֖סֶף הַנִּמְצָ֥א בֵית יי: (יב) וְנָתְנוּ֙ אֶת-הַכֶּ֣סֶף הַֽמְתֻכָּ֔ן עַל יְדֵי֙ עֹשֵׂ֣י הַמְּלָאכָ֔ה הַמֻּפְקָדִ֖ים בֵּ֣ית יְהוָ֑ה וַיּוֹצִיאֻ֜הוּ לְחָרָשֵׁ֤י הָעֵץ֙ וְלַבֹּנִ֔ים הָעֹשִׂ֖ים בֵּ֥ית יי: (יג) וְלַגֹּֽדְרִים֙ וּלְחֹצְבֵ֣י הָאֶ֔בֶן וְלִקְנ֤וֹת עֵצִים֙ וְאַבְנֵ֣י מַחְצֵ֔ב לְחַזֵּ֖ק אֶת-בֶּ֣דֶק בֵּית-יי וּלְכֹ֛ל אֲשֶׁר-יֵצֵ֥א עַל-הַבַּ֖יִת לְחָזְקָֽה: (יד) אַךְ֩ לֹ֨א יֵעָשֶׂ֜ה בֵּ֣ית יי סִפּ֥וֹת כֶּ֙סֶף֙ מְזַמְּר֤וֹת מִזְרָקוֹת֙ חֲצֹ֣צְר֔וֹת כָּל-כְּלִ֥י זָהָ֖ב וּכְלִי-כָ֑סֶף מִן-הַכֶּ֖סֶף הַמּוּבָ֥א בֵית-יי: (טו) כִּֽי-לְעֹשֵׂ֥י הַמְּלָאכָ֖ה יִתְּנֻ֑הוּ וְחִזְּקוּ-ב֖וֹ אֶת-בֵּ֥ית יי: (טז) וְלֹ֧א יְחַשְּׁב֣וּ אֶת-הָאֲנָשִׁ֗ים אֲשֶׁ֨ר יִתְּנ֤וּ אֶת-הַכֶּ֙סֶף֙ עַל-יָדָ֔ם לָתֵ֖ת לְעֹשֵׂ֣י הַמְּלָאכָ֑ה כִּ֥י בֶאֱמֻנָ֖ה הֵ֥ם עֹשִֽׂים: (יז) כֶּ֤סֶף אָשָׁם֙ וְכֶ֣סֶף חַטָּא֔וֹת לֹ֥א יוּבָ֖א בֵּ֣ית יי לַכֹּהֲנִ֖ים יִהְיֽוּ:
Haftarat Zakhor
Rite marocain
Rite tunisien
(א) וַיֹּ֤אמֶר שְׁמוּאֵל֙ אֶל-שָׁא֔וּל אֹתִ֨י שָׁלַ֤ח יי לִמְשָׁחֳךָ֣ לְמֶ֔לֶךְ עַל-עַמּ֖וֹ עַל-יִשְׂרָאֵ֑ל וְעַתָּ֣ה שְׁמַ֔ע לְק֖וֹל דִּבְרֵ֥י יי: (ב) כֹּ֤ה אָמַר֙ יי צְבָא֔וֹת פָּקַ֕דְתִּי אֵ֛ת אֲשֶׁר-עָשָׂ֥ה עֲמָלֵ֖ק לְיִשְׂרָאֵ֑ל אֲשֶׁר-שָׂ֥ם לוֹ֙ בַּדֶּ֔רֶךְ בַּעֲלֹת֖וֹ מִמִּצְרָֽיִם: (ג) עַתָּה֩ לֵ֨ךְ וְהִכִּֽיתָ֜ה אֶת-עֲמָלֵ֗ק וְהַֽחֲרַמְתֶּם֙ אֶת-כָּל-אֲשֶׁר-ל֔וֹ וְלֹ֥א תַחְמֹ֖ל עָלָ֑יו וְהֵמַתָּ֞ה מֵאִ֣ישׁ עַד-אִשָּׁ֗ה מֵֽעֹלֵל֙ וְעַד-יוֹנֵ֔ק מִשּׁ֣וֹר וְעַד-שֶׂ֔ה מִגָּמָ֖ל וְעַד-חֲמֽוֹר: (ד) וַיְשַׁמַּ֤ע שָׁאוּל֙ אֶת-הָעָ֔ם וַֽיִּפְקְדֵם֙ בַּטְּלָאִ֔ים מָאתַ֥יִם אֶ֖לֶף רַגְלִ֑י וַעֲשֶׂ֥רֶת אֲלָפִ֖ים אֶת-אִ֥ישׁ יְהוּדָֽה: (ה) וַיָּבֹ֥א שָׁא֖וּל עַד-עִ֣יר עֲמָלֵ֑ק וַיָּ֖רֶב בַּנָּֽחַל: (ו) וַיֹּ֣אמֶר שָׁא֣וּל אֶֽל-הַקֵּינִ֡י לְכוּ֩ סֻּ֨רוּ רְד֜וּ מִתּ֣וֹךְ עֲמָלֵקִ֗י פֶּן-אֹֽסִפְךָ֙ עִמּ֔וֹ וְאַתָּ֞ה עָשִׂ֤יתָה חֶ֙סֶד֙ עִם-כָּל-בְּנֵ֣י יִשְׂרָאֵ֔ל בַּעֲלוֹתָ֖ם מִמִּצְרָ֑יִם וַיָּ֥סַר קֵינִ֖י מִתּ֥וֹךְ עֲמָלֵֽק: (ז) וַיַּ֥ךְ שָׁא֖וּל אֶת-עֲמָלֵ֑ק מֵֽחֲוִילָה֙ בּוֹאֲךָ֣ שׁ֔וּר אֲשֶׁ֖ר עַל-פְּנֵ֥י מִצְרָֽיִם: (ח) וַיִּתְפֹּ֛שׂ אֶת-אֲגַ֥ג מֶֽלֶךְ-עֲמָלֵ֖ק חָ֑י וְאֶת-כָּל-הָעָ֖ם הֶחֱרִ֥ים לְפִי-חָֽרֶב: (ט) וַיַּחְמֹל֩ שָׁא֨וּל וְהָעָ֜ם עַל-אֲגָ֗ג וְעַל-מֵיטַ֣ב הַצֹּאן֩ וְהַבָּקָ֨ר וְהַמִּשְׁנִ֤ים וְעַל-הַכָּרִים֙ וְעַל-כָּל-הַטּ֔וֹב וְלֹ֥א אָב֖וּ הַחֲרִימָ֑ם וְכָל-הַמְּלָאכָ֛ה נְמִבְזָ֥ה וְנָמֵ֖ס אֹתָ֥הּ הֶחֱרִֽימוּ: (י) וַֽיְהִי֙ דְּבַר-יי אֶל-שְׁמוּאֵ֖ל לֵאמֹֽר: (יא) נִחַ֗מְתִּי כִּֽי-הִמְלַ֤כְתִּי אֶת-שָׁאוּל֙ לְמֶ֔לֶךְ כִּֽי-שָׁב֙ מֵאַֽחֲרַ֔י וְאֶת-דְּבָרַ֖י לֹ֣א הֵקִ֑ים וַיִּ֙חַר֙ לִשְׁמוּאֵ֔ל וַיִּזְעַ֥ק אֶל-יי כָּל-הַלָּֽיְלָה: (יב) וַיַּשְׁכֵּ֧ם שְׁמוּאֵ֛ל לִקְרַ֥את שָׁא֖וּל בַּבֹּ֑קֶר וַיֻּגַּ֨ד לִשְׁמוּאֵ֜ל לֵאמֹ֗ר בָּֽא-שָׁא֤וּל הַכַּרְמֶ֙לָה֙ וְהִנֵּ֨ה מַצִּ֥יב לוֹ֙ יָ֔ד וַיִּסֹּב֙ וַֽיַּעֲבֹ֔ר וַיֵּ֖רֶד הַגִּלְגָּֽל: (יג) וַיָּבֹ֥א שְׁמוּאֵ֖ל אֶל-שָׁא֑וּל וַיֹּ֧אמֶר ל֣וֹ שָׁא֗וּל בָּר֤וּךְ אַתָּה֙ לַיי הֲקִימֹ֖תִי אֶת-דְּבַ֥ר יי: (יד) וַיֹּ֣אמֶר שְׁמוּאֵ֔ל וּמֶ֛ה קֽוֹל-הַצֹּ֥אן הַזֶּ֖ה בְּאָזְנָ֑י וְק֣וֹל הַבָּקָ֔ר אֲשֶׁ֥ר אָנֹכִ֖י שֹׁמֵֽעַ: (טו) וַיֹּ֨אמֶר שָׁא֜וּל מֵעֲמָלֵקִ֣י הֱבִיא֗וּם אֲשֶׁ֨ר חָמַ֤ל הָעָם֙ עַל-מֵיטַ֤ב הַצֹּאן֙ וְהַבָּקָ֔ר לְמַ֥עַן זְבֹ֖חַ לַיי אֱלֹקיךָ וְאֶת-הַיּוֹתֵ֖ר הֶחֱרַֽמְנוּ: (טז) וַיֹּ֤אמֶר שְׁמוּאֵל֙ אֶל-שָׁא֔וּל הֶ֚רֶף וְאַגִּ֣ידָה לְּךָ֔ אֵת֩ אֲשֶׁ֨ר דִּבֶּ֧ר יי אֵלַ֖י הַלָּ֑יְלָה וַיֹּ֥אמֶר ל֖וֹ דַּבֵּֽר: (יז) וַיֹּ֣אמֶר שְׁמוּאֵ֔ל הֲל֗וֹא אִם-קָטֹ֤ן אַתָּה֙ בְּעֵינֶ֔יךָ רֹ֛אשׁ שִׁבְטֵ֥י יִשְׂרָאֵ֖ל אָ֑תָּה וַיִּמְשָׁחֲךָ֧ יי לְמֶ֖לֶךְ עַל-יִשְׂרָאֵֽל: (יח) וַיִּשְׁלָחֲךָ֥ יְהוָ֖ה בְּדָ֑רֶךְ וַיֹּ֗אמֶר לֵ֣ךְ וְהַחֲרַמְתָּ֞ה אֶת-הַֽחַטָּאִים֙ אֶת-עֲמָלֵ֔ק וְנִלְחַמְתָּ֣ ב֔וֹ עַ֥ד כַּלּוֹתָ֖ם אֹתָֽם: (יט) וְלָ֥מָּה לֹא-שָׁמַ֖עְתָּ בְּק֣וֹל יי וַתַּ֙עַט֙ אֶל-הַשָּׁלָ֔ל וַתַּ֥עַשׂ הָרַ֖ע בְּעֵינֵ֥י יי: (כ) וַיֹּ֨אמֶר שָׁא֜וּל אֶל-שְׁמוּאֵ֗ל אֲשֶׁ֤ר שָׁמַ֙עְתִּי֙ בְּק֣וֹל יי וָאֵלֵ֕ךְ בַּדֶּ֖רֶךְ אֲשֶׁר-שְׁלָחַ֣נִי יי וָאָבִ֗יא אֶת-אֲגַג֙ מֶ֣לֶךְ עֲמָלֵ֔ק וְאֶת-עֲמָלֵ֖ק הֶחֱרַֽמְתִּי: (כא) וַיִּקַּ֨ח הָעָ֧ם מֵהַשָּׁלָ֛ל צֹ֥אן וּבָקָ֖ר רֵאשִׁ֣ית הַחֵ֑רֶם לִזְבֹּ֛חַ לַֽיי אֱלֹהֶ֖יךָ בַּגִּלְגָּֽל: (כב) וַיֹּ֣אמֶר שְׁמוּאֵ֗ל הַחֵ֤פֶץ לַֽיי בְּעֹל֣וֹת וּזְבָחִ֔ים כִּשְׁמֹ֖עַ בְּק֣וֹל יי הִנֵּ֤ה שְׁמֹ֙עַ֙ מִזֶּ֣בַח ט֔וֹב לְהַקְשִׁ֖יב מֵחֵ֥לֶב אֵילִֽים: (כג) כִּ֤י חַטַּאת-קֶ֙סֶם֙ מֶ֔רִי וְאָ֥וֶן וּתְרָפִ֖ים הַפְצַ֑ר יַ֗עַן מָאַ֙סְתָּ֙ אֶת-דְּבַ֣ר יי וַיִּמְאָסְךָ֖ מִמֶּֽלֶךְ: (כד) וַיֹּ֨אמֶר שָׁא֤וּל אֶל-שְׁמוּאֵל֙ חָטָ֔אתִי כִּֽי-עָבַ֥רְתִּי אֶת-פִּֽי-יי וְאֶת-דְּבָרֶ֑יךָ כִּ֤י יָרֵ֙אתִי֙ אֶת-הָעָ֔ם וָאֶשְׁמַ֖ע בְּקוֹלָֽם: (כה) וְעַתָּ֕ה שָׂ֥א נָ֖א אֶת-חַטָּאתִ֑י וְשׁ֣וּב עִמִּ֔י וְאֶֽשְׁתַּחֲוֶ֖ה לַֽיי: (כו) וַיֹּ֤אמֶר שְׁמוּאֵל֙ אֶל-שָׁא֔וּל לֹ֥א אָשׁ֖וּב עִמָּ֑ךְ כִּ֤י מָאַ֙סְתָּה֙ אֶת-דְּבַ֣ר יי וַיִּמְאָסְךָ֣ יי מִהְי֥וֹת מֶ֖לֶךְ עַל-יִשְׂרָאֵֽל: (כז) וַיִּסֹּ֥ב שְׁמוּאֵ֖ל לָלֶ֑כֶת וַיַּחֲזֵ֥ק בִּכְנַף-מְעִיל֖וֹ וַיִּקָּרַֽע: (כח) וַיֹּ֤אמֶר אֵלָיו֙ שְׁמוּאֵ֔ל קָרַ֨ע יי אֶֽת-מַמְלְכ֧וּת יִשְׂרָאֵ֛ל מֵעָלֶ֖יךָ הַיּ֑וֹם וּנְתָנָ֕הּ לְרֵעֲךָ֖ הַטּ֥וֹב מִמֶּֽךָּ: (כט) וְגַם֙ נֵ֣צַח יִשְׂרָאֵ֔ל לֹ֥א יְשַׁקֵּ֖ר וְלֹ֣א יִנָּחֵ֑ם כִּ֣י לֹ֥א אָדָ֛ם ה֖וּא לְהִנָּחֵֽם: (ל) וַיֹּ֣אמֶר חָטָ֔אתִי עַתָּ֗ה כַּבְּדֵ֥נִי נָ֛א נֶ֥גֶד זִקְנֵֽי-עַמִּ֖י וְנֶ֣גֶד יִשְׂרָאֵ֑ל וְשׁ֣וּב עִמִּ֔י וְהִֽשְׁתַּחֲוֵ֖יתִי לַֽיי אֱלֹקיךָ: (לא) וַיָּ֥שָׁב שְׁמוּאֵ֖ל אַחֲרֵ֣י שָׁא֑וּל וַיִּשְׁתַּ֥חוּ שָׁא֖וּל לַֽיי: (לב) וַיֹּ֣אמֶר שְׁמוּאֵ֗ל הַגִּ֤ישׁוּ אֵלַי֙ אֶת-אֲגַג֙ מֶ֣לֶךְ עֲמָלֵ֔ק וַיֵּ֣לֶךְ אֵלָ֔יו אֲגַ֖ג מַעֲדַנֹּ֑ת וַיֹּ֣אמֶר אֲגָ֔ג אָכֵ֖ן סָ֥ר מַר-הַמָּֽוֶת: (לג) וַיֹּ֣אמֶר שְׁמוּאֵ֔ל כַּאֲשֶׁ֨ר שִׁכְּלָ֤ה נָשִׁים֙ חַרְבֶּ֔ךָ כֵּן-תִּשְׁכַּ֥ל מִנָּשִׁ֖ים אִמֶּ֑ךָ וַיְשַׁסֵּ֨ף שְׁמוּאֵ֧ל אֶת-אֲגָ֛ג לִפְנֵ֥י יי בַּגִּלְגָּֽל: (לד) וַיֵּ֥לֶךְ שְׁמוּאֵ֖ל הָרָמָ֑תָה וְשָׁא֛וּל עָלָ֥ה אֶל-בֵּית֖וֹ גִּבְעַ֥ת שָׁאֽוּל:
Haftarat Para
Rite marocain
Rite tunisien
(טז) וַיְהִ֥י דְבַר יי אֵלַ֥י לֵאמֹֽר: (יז) בֶּן-אָדָ֗ם בֵּ֤ית יִשְׂרָאֵל֙ יֹשְׁבִ֣ים עַל-אַדְמָתָ֔ם וַיְטַמְּא֣וּ אוֹתָ֔הּ בְּדַרְכָּ֖ם וּבַעֲלִֽילוֹתָ֑ם כְּטֻמְאַת֙ הַנִּדָּ֔ה הָיְתָ֥ה דַרְכָּ֖ם לְפָנָֽי: (יח) וָאֶשְׁפֹּ֤ךְ חֲמָתִי֙ עֲלֵיהֶ֔ם עַל-הַדָּ֖ם אֲשֶׁר-שָׁפְכ֣וּ עַל-הָאָ֑רֶץ וּבְגִלּוּלֵיהֶ֖ם טִמְּאֽוּהָ: (יט) וָאָפִ֤יץ אֹתָם֙ בַּגּוֹיִ֔ם וַיִּזָּר֖וּ בָּאֲרָצ֑וֹת כְּדַרְכָּ֥ם וְכַעֲלִילוֹתָ֖ם שְׁפַטְתִּֽים: (כ) וַיָּב֗וֹא אֶל-הַגּוֹיִם֙ אֲשֶׁר-בָּ֣אוּ שָׁ֔ם וַֽיְחַלְּל֖וּ אֶת-שֵׁ֣ם קָדְשִׁ֑י בֶּאֱמֹ֤ר לָהֶם֙ עַם יי אֵ֔לֶּה וּמֵאַרְצ֖וֹ יָצָֽאוּ: (כא) וָאֶחְמֹ֖ל עַל-שֵׁ֣ם קָדְשִׁ֑י אֲשֶׁ֤ר חִלְּל֙וּהוּ֙ בֵּ֣ית יִשְׂרָאֵ֔ל בַּגּוֹיִ֖ם אֲשֶׁר-בָּ֥אוּ שָֽׁמָּה: (כב) לָכֵ֞ן אֱמֹ֣ר לְבֵֽית-יִשְׂרָאֵ֗ל כֹּ֤ה אָמַר֙ יי אלקים לֹ֧א לְמַעַנְכֶ֛ם אֲנִ֥י עֹשֶׂ֖ה בֵּ֣ית יִשְׂרָאֵ֑ל כִּ֤י אִם-לְשֵׁם-קָדְשִׁי֙ אֲשֶׁ֣ר חִלַּלְתֶּ֔ם בַּגּוֹיִ֖ם אֲשֶׁר-בָּ֥אתֶם שָֽׁם: (כג) וְקִדַּשְׁתִּ֞י אֶת-שְׁמִ֣י הַגָּד֗וֹל הַֽמְחֻלָּל֙ בַּגּוֹיִ֔ם אֲשֶׁ֥ר חִלַּלְתֶּ֖ם בְּתוֹכָ֑ם וְיָדְע֨וּ הַגּוֹיִ֜ם כִּי-אֲנִ֣י יי נְאֻם֙ יי אלקים בְּהִקָּדְשִׁ֥י בָכֶ֖ם לְעֵינֵיהֶֽם: (כד) וְלָקַחְתִּ֤י אֶתְכֶם֙ מִן-הַגּוֹיִ֔ם וְקִבַּצְתִּ֥י אֶתְכֶ֖ם מִכָּל-הָאֲרָצ֑וֹת וְהֵבֵאתִ֥י אֶתְכֶ֖ם אֶל-אַדְמַתְכֶֽם: (כה) וְזָרַקְתִּ֧י עֲלֵיכֶ֛ם מַ֥יִם טְהוֹרִ֖ים וּטְהַרְתֶּ֑ם מִכֹּ֧ל טֻמְאוֹתֵיכֶ֛ם וּמִכָּל-גִּלּ֥וּלֵיכֶ֖ם אֲטַהֵ֥ר אֶתְכֶֽם: (כו) וְנָתַתִּ֤י לָכֶם֙ לֵ֣ב חָדָ֔שׁ וְר֥וּחַ חֲדָשָׁ֖ה אֶתֵּ֣ן בְּקִרְבְּכֶ֑ם וַהֲסִ֨רֹתִ֜י אֶת-לֵ֤ב הָאֶ֙בֶן֙ מִבְּשַׂרְכֶ֔ם וְנָתַתִּ֥י לָכֶ֖ם לֵ֥ב בָּשָֽׂר: (כז) וְאֶת-רוּחִ֖י אֶתֵּ֣ן בְּקִרְבְּכֶ֑ם וְעָשִׂ֗יתִי אֵ֤ת אֲשֶׁר-בְּחֻקַּי֙ תֵּלֵ֔כוּ וּמִשְׁפָּטַ֥י תִּשְׁמְר֖וּ וַעֲשִׂיתֶֽם: (כח) וִישַׁבְתֶּ֣ם בָּאָ֔רֶץ אֲשֶׁ֥ר נָתַ֖תִּי לַאֲבֹֽתֵיכֶ֑ם וִהְיִ֤יתֶם לִי֙ לְעָ֔ם וְאָ֣נֹכִ֔י אֶהְיֶ֥ה לָכֶ֖ם לאלקים: (כט) וְהוֹשַׁעְתִּ֣י אֶתְכֶ֔ם מִכֹּ֖ל טֻמְאֽוֹתֵיכֶ֑ם וְקָרָ֤אתִי אֶל-הַדָּגָן֙ וְהִרְבֵּיתִ֣י אֹת֔וֹ וְלֹא-אֶתֵּ֥ן עֲלֵיכֶ֖ם רָעָֽב: (ל) וְהִרְבֵּיתִי֙ אֶת-פְּרִ֣י הָעֵ֔ץ וּתְנוּבַ֖ת הַשָּׂדֶ֑ה לְמַ֗עַן אֲ֠שֶׁר לֹ֣א תִקְח֥וּ ע֛וֹד חֶרְפַּ֥ת רָעָ֖ב בַּגּוֹיִֽם: (לא) וּזְכַרְתֶּם֙ אֶת-דַּרְכֵיכֶ֣ם הָרָעִ֔ים וּמַעַלְלֵיכֶ֖ם אֲשֶׁ֣ר לֹֽא-טוֹבִ֑ים וּנְקֹֽטֹתֶם֙ בִּפְנֵיכֶ֔ם עַ֚ל עֲוֹנֹ֣תֵיכֶ֔ם וְעַ֖ל תּוֹעֲבֽוֹתֵיכֶֽם: (לב) לֹ֧א לְמַעַנְכֶ֣ם אֲנִֽי-עֹשֶׂ֗ה נְאֻם֙ יי אלקים יִוָּדַ֖ע לָכֶ֑ם בּ֧וֹשׁוּ וְהִכָּלְמ֛וּ מִדַּרְכֵיכֶ֖ם בֵּ֥ית יִשְׂרָאֵֽל: (לג) כֹּ֤ה אָמַר יי אלקים בְּיוֹם֙ טַהֲרִ֣י אֶתְכֶ֔ם מִכֹּ֖ל עֲוֹנֽוֹתֵיכֶ֑ם וְהֽוֹשַׁבְתִּי֙ אֶת-הֶ֣עָרִ֔ים וְנִבְנ֖וּ הֶחֳרָבֽוֹת: (לד) וְהָאָ֥רֶץ הַנְּשַׁמָּ֖ה תֵּֽעָבֵ֑ד תַּ֚חַת אֲשֶׁ֣ר הָיְתָ֣ה שְׁמָמָ֔ה לְעֵינֵ֖י כָּל-עוֹבֵֽר: (לה) וְאָמְר֗וּ הָאָ֤רֶץ הַלֵּ֙זוּ֙ הַנְּשַׁמָּ֔ה הָיְתָ֖ה כְּגַן-עֵ֑דֶן וְהֶעָרִ֧ים הֶחֳרֵב֛וֹת וְהַֽנְשַׁמּ֥וֹת וְהַנֶּהֱרָס֖וֹת בְּצוּר֥וֹת יָשָֽׁבוּ: (לו) וְיָדְע֣וּ הַגּוֹיִ֗ם אֲשֶׁ֣ר יִֽשָּׁאֲרוּ֮ סְבִיבוֹתֵיכֶם֒ כִּ֣י | אֲנִ֣י יי בָּנִ֙יתִי֙ הַנֶּ֣הֱרָס֔וֹת נָטַ֖עְתִּי הַנְּשַׁמָּ֑ה אֲנִ֥י יי דִּבַּ֥רְתִּי וְעָשִֽׂיתִי:
Haftarat Ha'hodech
Rite marocain
Rite tunisien
(יח) כֹּה-אָמַר֮ אֲדֹנָ֣י יי בָּֽרִאשׁוֹן֙ בְּאֶחָ֣ד לַחֹ֔דֶשׁ תִּקַּ֥ח פַּר-בֶּן-בָּקָ֖ר תָּמִ֑ים וְחִטֵּאתָ֖ אֶת-הַמִּקְדָּֽשׁ: (יט) וְלָקַ֨ח הַכֹּהֵ֜ן מִדַּ֣ם הַחַטָּ֗את וְנָתַן֙ אֶל-מְזוּזַ֣ת הַבַּ֔יִת וְאֶל-אַרְבַּ֛ע פִּנּ֥וֹת הָעֲזָרָ֖ה לַמִּזְבֵּ֑חַ וְעַ֨ל-מְזוּזַ֔ת שַׁ֖עַר הֶחָצֵ֥ר הַפְּנִימִֽית: (כ) וְכֵ֤ן תַּֽעֲשֶׂה֙ בְּשִׁבְעָ֣ה בַחֹ֔דֶשׁ מֵאִ֥ישׁ שֹׁגֶ֖ה וּמִפֶּ֑תִי וְכִפַּרְתֶּ֖ם אֶת-הַבָּֽיִת: (כא) בָּ֠רִאשׁוֹן בְּאַרְבָּעָ֨ה עָשָׂ֥ר יוֹם֙ לַחֹ֔דֶשׁ יִהְיֶ֥ה לָכֶ֖ם הַפָּ֑סַח חָ֕ג שְׁבֻע֣וֹת יָמִ֔ים מַצּ֖וֹת יֵאָכֵֽל: (כב) וְעָשָׂ֤ה הַנָּשִׂיא֙ בַּיּ֣וֹם הַה֔וּא בַּעֲד֕וֹ וּבְעַ֖ד כָּל-עַ֣ם הָאָ֑רֶץ פַּ֖ר חַטָּֽאת: (כג) וְשִׁבְעַ֨ת יְמֵֽי-הֶחָ֜ג יַעֲשֶׂ֧ה עוֹלָ֣ה לַֽיי שִׁבְעַ֣ת פָּ֠רִים וְשִׁבְעַ֨ת אֵילִ֤ים תְּמִימִם֙ לַיּ֔וֹם שִׁבְעַ֖ת הַיָּמִ֑ים וְחַטָּ֕את שְׂעִ֥יר עִזִּ֖ים לַיּֽוֹם: (כד) וּמִנְחָ֗ה אֵיפָ֥ה לַפָּ֛ר וְאֵיפָ֥ה לָאַ֖יִל יַֽעֲשֶׂ֑ה וְשֶׁ֖מֶן הִ֥ין לָאֵיפָֽה: (כה) בַּשְּׁבִיעִ֡י בַּחֲמִשָּׁה֩ עָשָׂ֨ר י֤וֹם לַחֹ֙דֶשׁ֙ בֶּחָ֔ג יַעֲשֶׂ֥ה כָאֵ֖לֶּה שִׁבְעַ֣ת הַיָּמִ֑ים כַּֽחַטָּאת֙ כָּעֹלָ֔ה וְכַמִּנְחָ֖ה וְכַשָּֽׁמֶן: (א) כֹּֽה-אָמַר֮ יי אלקים שַׁ֜עַר הֶחָצֵ֤ר הַפְּנִימִית֙ הַפֹּנֶ֣ה קָדִ֔ים יִהְיֶ֣ה סָג֔וּר שֵׁ֖שֶׁת יְמֵ֣י הַֽמַּעֲשֶׂ֑ה וּבְי֤וֹם הַשַּׁבָּת֙ יִפָּתֵ֔חַ וּבְי֥וֹם הַחֹ֖דֶשׁ יִפָּתֵֽחַ: (ב) וּבָ֣א הַנָּשִׂ֡יא דֶּרֶךְ֩ אוּלָ֨ם הַשַּׁ֜עַר מִח֗וּץ וְעָמַד֙ עַל-מְזוּזַ֣ת הַשַּׁ֔עַר וְעָשׂ֣וּ הַכֹּהֲנִ֗ים אֶת-עֽוֹלָתוֹ֙ וְאֶת-שְׁלָמָ֔יו וְהִֽשְׁתַּחֲוָ֛ה עַל-מִפְתַּ֥ן הַשַּׁ֖עַר וְיָצָ֑א וְהַשַּׁ֥עַר לֹֽא-יִסָּגֵ֖ר עַד-הָעָֽרֶב: (ג) וְהִשְׁתַּחֲו֣וּ עַם-הָאָ֗רֶץ פֶּ֚תַח הַשַּׁ֣עַר הַה֔וּא בַּשַּׁבָּת֖וֹת וּבֶחֳדָשִׁ֑ים לִפְנֵ֖י יי: (ד) וְהָ֣עֹלָ֔ה אֲשֶׁר-יַקְרִ֥ב הַנָּשִׂ֖יא לַיי בְּי֣וֹם הַשַּׁבָּ֗ת שִׁשָּׁ֧ה כְבָשִׂ֛ים תְּמִימִ֖ם וְאַ֥יִל תָּמִֽים: (ה) וּמִנְחָה֙ אֵיפָ֣ה לָאַ֔יִל וְלַכְּבָשִׂ֥ים מִנְחָ֖ה מַתַּ֣ת יָד֑וֹ וְשֶׁ֖מֶן הִ֥ין לָאֵיפָֽה: (ו) וּבְי֣וֹם הַחֹ֔דֶשׁ פַּ֥ר בֶּן-בָּקָ֖ר תְּמִימִ֑ם וְשֵׁ֧שֶׁת כְּבָשִׂ֛ם וָאַ֖יִל תְּמִימִ֥ם יִהְיֽוּ: (ז) וְאֵיפָ֨ה לַפָּ֜ר וְאֵיפָ֤ה לָאַ֙יִל֙ יַעֲשֶׂ֣ה מִנְחָ֔ה וְלַ֨כְּבָשִׂ֔ים כַּאֲשֶׁ֥ר תַּשִּׂ֖יג יָד֑וֹ וְשֶׁ֖מֶן הִ֥ין לָאֵיפָֽה: (ח) וּבְב֖וֹא הַנָּשִׂ֑יא דֶּ֣רֶךְ אוּלָ֤ם הַשַּׁ֙עַר֙ יָב֔וֹא וּבְדַרְכּ֖וֹ יֵצֵֽא: (ט) וּבְב֨וֹא עַם-הָאָ֜רֶץ לִפְנֵ֣י יי בַּמּֽוֹעֲדִים֒ הַבָּ֡א דֶּרֶךְ-שַׁ֨עַר צָפ֜וֹן לְהִֽשְׁתַּחֲוֹ֗ת יֵצֵא֙ דֶּרֶךְ-שַׁ֣עַר נֶ֔גֶב וְהַבָּא֙ דֶּרֶךְ-שַׁ֣עַר נֶ֔גֶב יֵצֵ֖א דֶּרֶךְ-שַׁ֣עַר צָפ֑וֹנָה לֹ֣א יָשׁ֗וּב דֶּ֤רֶךְ הַשַּׁ֙עַר֙ אֲשֶׁר-בָּ֣א ב֔וֹ כִּ֥י נִכְח֖וֹ יֵצֵֽא: (י) וְֽהַנָּשִׂ֑יא בְּתוֹכָ֤ם בְּבוֹאָם֙ יָב֔וֹא וּבְצֵאתָ֖ם יֵצֵֽאוּ: (יא) וּבַחַגִּ֣ים וּבַמּוֹעֲדִ֗ים תִּהְיֶ֤ה הַמִּנְחָה֙ אֵיפָ֤ה לַפָּר֙ וְאֵיפָ֣ה לָאַ֔יִל וְלַכְּבָשִׂ֖ים מַתַּ֣ת יָד֑וֹ וְשֶׁ֖מֶן הִ֥ין לָאֵיפָֽה: (יב) וְכִֽי-יַעֲשֶׂה֩ הַנָּשִׂ֨יא נְדָבָ֜ה עוֹלָ֣ה אֽוֹ-שְׁלָמִים֮ נְדָבָ֣ה לַיי וּפָ֣תַֽח ל֗וֹ אֶת הַשַּׁ֙עַר֙ הַפֹּנֶ֣ה קָדִ֔ים וְעָשָׂ֤ה אֶת-עֹֽלָתוֹ֙ וְאֶת-שְׁלָמָ֔יו כַּאֲשֶׁ֥ר יַעֲשֶׂ֖ה בְּי֣וֹם הַשַּׁבָּ֑ת וְיָצָ֛א וְסָגַ֥ר אֶת-הַשַּׁ֖עַר אַחֲרֵ֥י צֵאתֽוֹ: (יג) וְכֶ֨בֶשׂ בֶּן-שְׁנָת֜וֹ תָּמִ֗ים תַּעֲשֶׂ֥ה עוֹלָ֛ה לַיּ֖וֹם לַֽיי בַּבֹּ֥קֶר בַּבֹּ֖קֶר תַּעֲשֶׂ֥ה אֹתֽוֹ: (יד) וּמִנְחָה֩ תַעֲשֶׂ֨ה עָלָ֜יו בַּבֹּ֤קֶר בַּבֹּ֙קֶר֙ שִׁשִּׁ֣ית הָֽאֵיפָ֔ה וְשֶׁ֛מֶן שְׁלִישִׁ֥ית הַהִ֖ין לָרֹ֣ס אֶת-הַסֹּ֑לֶת מִנְחָה֙ לַֽיי חֻקּ֥וֹת עוֹלָ֖ם תָּמִֽיד: (טו) יַעֲשׂ֨וּ אֶת-הַכֶּ֧בֶשׂ וְאֶת-הַמִּנְחָ֛ה וְאֶת-הַשֶּׁ֖מֶן בַּבֹּ֣קֶר בַּבֹּ֑קֶר עוֹלַ֖ת תָּמִֽיד:
